《金都》新晉導演拍出新生代女性心聲 中港同「踎」暗藏巧思
好簡單，有Stephy，冇方力申。咁就一定要睇。
網上圖片
早前由鄧麗欣主演嘅最新港產片《金都》舉行優先場，杜汶澤喺社交網站力讚。《金都》係第四屆「首部劇情電影計劃」嘅優勝作品，由《瑪嘉烈與大衛系列－綠豆》編劇黃綺琳執導。今年總共有兩部港產片入圍金馬獎，其中《金都》總共有三項提名，包括：最佳新晉導演、最佳男主角、最佳原創電影歌曲。估計以而家香港電影界嘅狀況，《金都》應該可以喺香港電影金像獎成為大贏家。
網上圖片
《金都》講述女主角周莉芳喺金都商場嘅婚紗鋪返工，佢男朋友Edward喺金都商場入面開左間婚紗攝影鋪頭，兩個人同居多年。於是Edward順利成章地向張莉芳當眾求婚，逼於群眾壓力，阿芳惟有應承。但其實內情唔係咁簡單，事關佢喺十年前因為等錢洗而同一個中國人假結婚，幫對方申請單程證。原本以為當年嘅中介人已經幫佢地搞埋離婚手續，但點知來最後中介畀人拉左，搞到阿芳仲係已婚人士。佢要先揾到「假老公」離婚，先可以同「真老公」結婚。
網上圖片
《金都》之所以咁受大家讚賞基本上有三個原因，第一：具本土特色，電影以喺太子嘅金都商場為主要背景，香港觀眾睇到會覺得有共鳴；外地觀眾嚟睇又會覺得有特色，佢地會發現原來香港係有個專賣平價婚禮用品嘅商場，相當特別。第二：導演利用自身經驗做創作，別具誠意。黃綺琳導演喺唔同嘅訪問都有提過，《金都》嘅故事其實有某部分係參考自己某個前男友嘅經歷，當時男友因為畀自己阿媽逼婚，所以就向佢求婚，喺對方父母多番干預之下最終分手收場。佢開始反思婚姻嘅意義到底係咩，所以佢都好強調自己唔係反對結婚，係要揀個啱嘅人去結婚。導演好強調「選擇」，所以結局就留低選擇權畀女主角阿芳。
網上圖片
而《金都》第三個令人擊節讚賞嘅原因，就係細節。由對白、服裝、演出，盡皆可見導演巧思。由朱柏康飾演嘅Edward，由一出場見到堅持幫女友遮返住胸圍帶、堅持要幫女友拎晒所有嘢，到無時無刻都會Send 訊息Check女友動向。但另一方面呢個睇落咁大男人嘅Edward，其實係一個大細路，鍾意打機、剪完腳甲又唔會清返乾淨地方、屋企會擺放《星戰》BB-8公仔、平日開口埋口「阿媽話」。兩種睇矛盾嘅性格擺喺同一個角色身上，但朱柏康又出乎意料地演得出色，所以提名金馬影帝絕對實至名歸。Edward同阿芳，一個性格外放而另一個沉穩內斂，兩個角色一動一靜，做到互補效果。去到中後段嘅嘈交戲，鄧麗欣爆發先前隱藏嘅情緒更見張力。可能導演擔心呢類情節會太沉重，特意加入唔少幽默位，等觀眾抖抖氣（Comic Relief），例如會睇到男女主角吵大鑊之後就會有笑位。但呢類搞笑情節點到即止，唔會破壞戲劇結構，相當難得。
網上圖片
成部《金都》最精彩之處就係女主角阿芳同「假老公」楊樹偉嘅關係，兩個人本來係假結婚，素未謀面。一個急住要真結婚，一個就要拎香港身分證，為左要令到呢場「婚姻」變得更真實以求順利通過單程證面試，佢地要製造大量嘅婚姻生活證據。阿芳同中國假老公一齊行傢俬鋪，不停影相打卡自拍，佢仲幫阿芳裝埋微信，以便聯絡。其中楊樹偉就笑指全世界只中國大陸人先可以腳踭掂住地咁踎，叫阿芳可以試下，結果就真係做唔到。呢一段戲情節曖昧，令觀眾覺得假結婚似混雜真感情，港中霧水情緣，頗具浪漫感覺。而《金都》最神來之筆就係當阿芳喺藥房偶遇楊樹勇，佢當時踎喺地下將大量奶粉收入喼。阿芳就喺竟然一齊踎喺地下同楊樹勇傾偈，楊見到佢成功腳踭掂到地，就笑住話其實每個人都可以咁踎，始終人類都係由馬騮進化而成。似乎暗指香港人又好、中國人好，其實大家都一樣嘅，唔會有咩分別。
網上圖片
去到《金都》尾聲，阿芳決定要揾返屬於自己嘅自由，毅然搭左中港巴士，穿州過省、越過大灣區，最後上到福州探望楊樹偉同佢太太（入場睇戲就知解會咁），之後就去左一間「香港都食到」嘅福州街邊麵檔，開左手機發現男友Edward繼續不停怒炸訊息，但阿芳泰然自若咁上網買左一張之前同楊行傢俬鋪睇中嘅枱，似乎喺呢一刻阿芳喺中國福州得到佢要自由。
網上圖片
電影向來強調細節，所謂魔鬼在細節，天使同樣亦在細節。一個香港人可以喺祖國大陸揾到真正自由，喺香港就連買張枱、着自己鍾意嘅衫都唔得。人人生而自由，邊度有自由咪要去邊度囉，就算要搭中港巴士都唔緊要。
網上圖片
