《星球大戰：天行者崛起》一班演員捱熱又捱凍 只求完美演出
真正專業。
網上圖片
世紀科幻神作《星球大戰》（Star Wars），嚟到今次最終部曲《星球大戰：天行者崛起》（Star Wars：The Rise of Skywalker），唔止喺影迷，就連一班演員同劇組都相當唔捨得系列要完結。主角Rey 黛絲烈尼（Daisy Ridley）就喺其他媒體訪問度入面表示，喺拍攝嗰陣有好多淚水；飾演朱兒（Chewie）嘅Joonas Suotamo 都話拍攝過程比起想像中更加辛苦。今次作品絕對係誠意兼備、血汗之作。
網上圖片
今次黛絲烈一樣要應付大量動作場面，佢喺開拍前半年就做好晒準備，佢話：「我喺一月開始訓練，到八月開拍，最擔心係會覺得攰，因為好多日拍攝都有份。而且仲要應付好多高難度動作場面，例如要喺三十呎高平台跳落地，咁當然係有吊威吔，但係都係要喺一張墊上面落地。不過我好信任工作人員，我覺得可以做到好多以前認為做唔到嘅嘢。」
網上圖片
由《星戰》第7集開始做朱兒嘅芬蘭演員Joonas Suotamo，就喺呢個角色有唔少感悟，佢成日都要着咁重嘅戲服，表示一班工作人員都好錫佢：「大家都成日會好關心我會唔會太熱或者有冇唔舒服，佢地會成日叫我除左件戲服，我就會睇下仲有幾多時間，如果得返20分鐘我就寧願唔除。我會自我催眠， 去同自己講話好舒服。我成日都講笑話我喺芬蘭長大，嗰度咁多桑拿，係幫到我去適應着住呢套戲服。」最慘就係製作團隊去約旦取景，熱到不得了，黛絲表示去拍完約旦嘅戲份之後對卻痛到不得了。
網上圖片
除左要忍受約旦嘅炎熱天氣之外，黛絲烈尼同佢嘅對手Kylo Ren阿當載華其中一幕嘅打鬥場面要捱凍，事關佢地要畀水炮射住打鬥。又要捱凍又要捱熱、幾十米跳落地、着住勁重戲服，就算今次《星球大戰：天行者崛起》唔係打住《星戰》牌頭都好，見到一班演員咁戮力演出都已經值回票價。
