美國畫家自製《標殺令3》海報 塔倫天奴確認三年內會拍第三集
阿標都死左，咁第三集要殺邊個呢？
網上圖片
唔少昆頓影迷都相當好奇《標殺令》系列會唔會出第三集，早前一位美國畫家BossLogic 喺社交媒體POST左自己設計嘅《標殺令3》電影海報，等一班影迷望梅止渴。BossLogic 設計別出心裁，如果真係《標殺令》真係出第三集，應該直接拎嚟用都冇問題。《標殺令》英文片名《Kill Bill》，畫家喺「B」字整啲血跡，喺字母嘅曲線位勾畫出「3」字。呢個影迷版海報相當搶眼，不過目前仲未有任何嘅官方消息公布會開拍《標殺令3》。
塔倫天奴嘅近作《從前，有個荷里活》成為下屆奧斯卡熱門作品，之前都好多人問佢關於第十部電影嘅問題，當然提及到《標殺令3》。最近佢喺美國電台節目受訪，再次提到呢件事。
網上圖片
塔倫天奴喺節目就話：「我尋晚同奧瑪花曼 (Uma Thurman)食飯，我地大家都喺度互相吹捧，係一個好開心嘅夜晚。我的確係有一個計劃，同埋有認真諗過點去征服呢個概念。」
網上圖片
「咁就係新娘喺之後會遇到咩事，同埋我想做啲咩嘢。我唔想就咁求其諗另一個離譜嘅冒險故事出嚟，我地唔應該咁樣對女主角。新娘已經同敵人打左兩集，我而家可能又諗到條好橋，但我唔會淨係做少少就算，可能會度多三年先會實行出嚟。但係，我可以肯定《標殺令3》已經喺我嘅計劃之中。」
網上圖片
雖然塔倫天奴已經肯定左佢會想拍《標殺令3》，但係佢似乎有大量計劃要做，佢而家手頭上有舞台劇、劇集同埋有本書想出版，佢嚟緊仲有五集劇本要拍。所以可能有排都唔會睇到第十部塔倫天奴嘅作品。
