【跑 · 動】吉爾吉斯挑戰賽2019 • 下卷一
來啦來啦，終於都去到戲肉，吉爾吉斯80公里挑戰賽，究竟嗰三日發生咗啲乜嘢， 區區80公里又點解要行足三日？我哋一齊睇吓啦！
Day 7 - 比賽第一天
比賽當天，所有賽手都整理好行裝，從酒店出發到國家公園入口，作為一個自給自足（self-sufficient）嘅比賽（即係三日着嘅訓嘅食嘅都要自己帶上身，大會只係提供熱水同埋比賽途中飲用水）， 今次呢個比賽可以話係豪華團， 因為每一晚都會住喺當地嘅收費營地又或者山屋，就算冇涼冲都起碼有瓦遮頭，同埋山區溫度好低，如果乜都要自己帶個背囊肯定又大又重。第一日嘅賽道以農村為主，由於海拔較高嘅關係，個太陽都特別晒，雖然天氣好好，但係前一日去掛路標嘅時候經歷過天氣突然變壞，短短一個鐘內可以由陽光普照變成落冰雹，所以我哋都唔敢掉以輕心。由於係山區，附近又有好多牧民，所以沿途有好多自由放養嘅牛馬。經歷左頭十公里壯麗嘅山脊景色之後，跑手就沿着河谷進發， 兩旁都係密麻麻嘅參天巨木，河道收窄嘅時候河水萬馬奔騰，河道寬闊嘅時候往往有一大片嘅草原，風景靚絕。不過我哋工作人員就慘啦，因為我哋需要坐住一架俄羅斯製嘅戰地救護車去穿越呢一段嘅河谷路，個俄羅斯籍嘅司機同我地講，呢架車係蘇聯解體之前負責運輸傷者醫療物資入山區用，車齡超過30年！不過戰鬥民族真係唔同啲，條路我見啲賽手跑起上嚟都要就住就住，個俄羅斯司機好多位諗都唔諗比油就飛落去，短短十零公里路程真係驚心動魄半小時！
比賽第一晚嘅營地係一個河邊嘅大草原，好多遊客會專程坐四驅車入嚟露營，賽手衝線都趁機用河水抹下身，但係當佢哋一掂到啲河水都一定會尖叫出嚟，因為嗰啲係冰山嘅溶雪水，超凍！營地原來有一個收費嘅桑拿浴，只要比少少錢就可以入去一個長期燒著熊熊烈火嘅帳篷入面焗桑拿，焗完仲可以即刻走出嚟跳入啲冰水度享受冰火五重天嘅樂趣！不過除咗幾個當地同俄羅斯嘅遊客有膽接受呢個挑戰之外，我哋嘅賽手就情願圍住個火爐食吓飯傾吓計好過。山區嘅氣溫夜晚跌到得返幾度，好多賽手都圍住個營火傾計，順便用火乾返之前整濕咗嘅鞋襪，由於完全零光害，啲星星多到不得了，大家就係咁靚嘅景色同氣氛下渡過左比賽嘅第一晚。
Day 8 - 比賽第二天
比賽第二天係精華所在，跑手需要翻越高達3900米嘅高山湖（Ala kul）隘口，由於路段陡峭，兼且中途沒有任何退路，工作人員同賽事總監Felix於第一日都小心觀察各賽手嘅表現，任何力有不逮的賽手將會直接用越野車送到第二日的營地，Felix更加於天光前到達3900米的隘囗，觀察天氣狀況，如果天氣有任何變壞跡象，則會用無線電通知工作人員，將賽手安置到路線中途的山屋暫避，如果賽手不能於指定時間經過山屋，工作人員將要求他們沿途折返。比賽開始兩小時後的確灑了一場小小的雨雪，幸好很快便停止，而全部賽手都能於指定時間內通過山屋，向高山湖進發。
Ala Kul高山湖全年大部份時間都係結冰狀態，只有夏天先會融雪，賽手一步一步艱辛咁向著隘口進發，由於全段5公里都係恍如虎吼石河*咁嘅碎石路，跑慣香港山路嘅賽手明顯唔適應。再加埋有少少高山反應，呢段高山湖路段真係甘到不得了！雖然辛苦，不過好多賽手都讚嘆路線景色真係靚到不行，既有湖光山色嘅秀麗，又有大山嘅險峻，幾辛苦都係抵嘅！
*虎吼石河，大嶼山著名險地，顧名思義係一條非常陡峭嘅碎石石河。
經過3900米嘅隘口，就係連綿不絕嘅落山路，除咗隘口後嘅500米瀡滑梯式碎石路同一條百零米嘅冰河之外，大部份嘅路都幾好跑，好多賽手都可以下午茶時間左右到達營地。除咗可以飲杯茶食個麵之外，今次營地仲有溫泉浸，賽手可以選擇比少少錢浸室內嘅溫泉，又或者行2公里左右去一個免費嘅天然嘅溫泉。經歷左碎石路嘅煎熬，全部賽手都係唔使諗，比錢！因為吉爾吉斯日照時間長，浸完溫泉都仲未天黑，我就同其他賽手一齊租咗匹馬，響個超靚嘅大草原上面騎下馬仔，享受一下牧民生活！
未完待續......
【作者簡介】
Norman
Run For Good 創辦人，退役運動員，前外展教練，現在是跑得慢唔夠快冇速度的跑手一名。
