【跑 · 動】橫渡日本320公里之旅 · 卷一
疫情反覆，不如就等我繼續用文字去帶大家眼睛去旅行啦！
話說兩年前我同幾位親密戰友一齊遠征法國參UTMB系列賽最具挑戰性嘅PTL 300KM超長途賽，後來因傷於100公里左右退出，心有不甘嘅我一直都好想完成一個300公里嘅旅程，彌補之前退賽嘅遺憾。有日放假百無聊賴之際，上咗Google去找尋300公里嘅道路，終於決定咗由日本嘅東岸東京築地市場起步，跑到西岸嘅新潟縣海旁。沿途完全由Google帶領（如果大家想知道詳細路線，只需喺Google Maps入面嘅起點輸入東京築地市場，終點輸入新潟水族館，成條320公里嘅路線就出晒嚟），相信亦都冇人試過咁樣跑法。搞掂條路之後就嗱嗱聲book埋機票，於三月尾日本天氣比較涼爽之際出發！
計過條數，320公里嘅旅程，點都冇可能一次過跑晒，既然係一個自我放空嘅旅程，咁不如每日跑50-60公里，七日內完成（中間有個rest day浸下溫泉），有挑戰性之餘又可以全心感受呢個放空之旅。成個旅程只係背負一個5L跑袋，入面只係裝住一套替換衫褲，自拍棍，叉電器，同埋少少藥物必須品等等。至於酒店方面，因為成條路未跑過，亦都唔知天氣腳程等等，所以除咗第一晚嘅酒店book左之外，其他就見步行步有酒店就瞓好啲冇酒店就瞓火車站。
機票方面，因為貪平，所以買廉航red eye flight半夜出發凌晨到達，摸黑去築地市場食個早餐就即刻起步啱啱好。咁當然要經歷一個通宵跟住即刻跑好似好辛苦咁，不過玩慣長途山賽嘅朋友都知，一個通宵之後再跑步其實係常態，有得喺飛機上面眠一眠已經係恩賜。
降落後，一個箭步離開機艙，夜半嘅羽田機場人唔多，好快過埋海關又冇行李拎，從來未試過由飛機到離開禁區閘口15分鐘搞掂！搭頭班JR去到築地市場啱啱天光。滿心歡喜諗住去場外巿場睇拍賣，點知原來是日休息.......唯有周圍行吓睇下有冇野食，不過原來築地都有好幾間通宵營業嘅壽司壽司店，入面有啲西裝骨骨不過爛醉如泥嘅打工仔（我估係），睇嚟係飲完通宵之後直接返工，有人話日本繁榮背後其實好悲情，想感受下嘅朋友們記得下次去築地市場早少少，你可以見到一鱗半爪。
食完就把握時間去到海旁，影張起步照就開始七日嘅旅程啦！跑步12年，大大小小都跑過過百場比賽，無論個比賽幾細都起碼有幾十人一齊起步，今次自己一個人，感覺放空又平靜，自己響心入面倒數，三二一就出發，千里之行，始於足下！
待續.........
